絲絲尋日去飲茶，撞到ING香港及澳門地區保險及退休金聯席主管夏哲偉，見佢容光煥發，當然要問吓有乜好事。原來佢早前與260多名ING員工去咗雅典出席慶祝會，之後順道返荷蘭阿姆斯特丹嘅老家，享受家鄉嘅宜人風光，自然心情開朗。不過佢亦牙痛咁聲，話家鄉自從入咗歐元區後，物價好似貴咗成倍。
其實佢仲有件更開心嘅事，就係ING今年上半年嘅成績好好，香港壽險業務嘅新生意收入較去年同期多咗106%，約達9.2億元；總保費收入近21億元，亦多咗48%。業務增長就夠晒厲害，唔知ING嚟緊有乜搞作？佢話ING集團分拆保險及銀行業務會喺今年完成，嚟緊希望擴展保險嘅銷售渠道，明年底前增加前線銷售人員至2,000人。
唔講唔知，原來夏哲偉曾經喺啤酒品牌喜力打過工，佢仲牙擦擦咁話自己酒量好好，即係中國人所講嘅「酒筲箕」；睇見ING成績咁好，唔知佢會唔會請絲絲飲番兩杯呢？
余絲韻