絲絲講場：梁太伴「萬歲」賀中秋
今日係中秋佳節，相信好多人與絲絲一樣，為咗買乜嘢口味嘅月餅又或者安排節目而煩惱，但社會上其實唔係個個都咁幸運，可享受中秋節人月兩團圓嘅歡樂。恒生（00011）日前與一班長者共慶中秋，將佢哋嘅歲數加埋真係不得了，一共超過一萬歲，真係名副其實嘅「萬歲」宴。
絲絲冇咁好數口，其實係恒生副董事長兼行政總裁梁高美懿講嘅，佢話參加嘅長者歲數加起來，合共超過1.2萬歲，可以稱得上係一個「愛心中秋萬歲宴」，聽落又真係幾好意頭喎！
率義工招待逾170長者
今年已經係恒生第3年與嗇色園可健耆英地區中心合作，喺梁太帶領下，招待咗超過170名嚟自深水埗嘅貧困或獨居長者，喺恒生總行博愛堂享用「愛心中秋宴」。出席嘅長者中，年紀最大嘅有成101歲。
每位長者除可享用豐富嘅節日菜式，仲獲贈送水果以及印有恒生標誌嘅健康月餅添！恒生方面亦十分重視呢次活動，出動咗50幾名該行義工擔任侍菜員，喺活動前，佢哋仲特登接受訓練，學習侍菜技巧，誠意可嘉。
睇到梁太嘅四萬式笑容，就知佢好享受與長者相處。梁太話好開心可以與咁多位長者一齊提早慶祝中秋，感覺就好似與好多家人一齊食飯咁，好親切。
余絲韻