期指觀瀾：後市維持大漲小回
華爾街股市憧憬聯儲局新一輪量化寬鬆措施出台，美股三大指數升幅介乎1.3%至1.7%，也為港股提供一個突破僵局的藉口。
尋日恒指及期指分別開出22,118及22,101點，由於已開始逼近22,284點的技術阻力區，本來就算高開低收，都已有交代。但是，現貨午市三點左右試一試低位21,968點之後，反覆向上，最後創下五個月以來首次在22,000點樓上收市，進一步引證，資金充裕，基金持股比重唔多的當下，港股仍處於大漲小回格局。
期指由低水變番高水，收報22,060點，現貨成交升至703億元，後市挑戰四月高位22,388點，甚至突破的機會看來頗大。
好倉日前平掉，尋日提議等21,950點再出現買貨，但見九月期指午市去到21,968點，已有跌唔落味道，再考慮近兩星期手上累積超過800點利潤，故筆者在22,000點再建好倉。大市基調不變，暫時可用逐步將止賺位推高的策略，以跌穿21,780點收市止蝕。今浪可以再升幾多，要睇期指去到22,203至22,512點間真正的阻力區後，方見真章。
John Mullen