兩星期前曾申請暫時停牌嘅僑威（01201），因為冇第一時間通知第二上市嘅台灣證券交易所，畀台灣罰錢兼留「案底」，日後增發股份可能會有障礙。但估唔到單嘢仲禍及無辜，台灣另一隻同名嘅科技股，就畀啲未搞清楚狀況嘅投資者掟貨，股價仲一度跌停添。
呢兩間公司都叫僑威，去台灣發ＴＤＲ嘅係僑威「控」，至於因為同名被「誤掟」嘅，係一間電源供應器廠商，個名少個「控」字。
咁啱要出半年業績嘅電源供應器廠商僑威，梗係極力澄清與僑威「控」冇任何關連；就算上半年純利比去年同期大升逾六成，但受到「同名之累」，股價仍跌三點五個巴仙。
余絲韻