本地服裝品牌堡獅龍（Bossini）（00592）公司管理層大執位，尋日一次過宣布4個變動，其中副主席、執行董事兼行政總裁陳素娟（Kathy）辭任，十月一日生效，而大股東羅家聖太太錢曼娟就由非執行主席轉任執行主席。
羅氏家族近期都好多新聞，除咗捲入爭產案，Bossini本身亦屢次被坊間傳賣殼，話羅家聖揸住嘅六成幾Bossini股份會放售。Bossini去年七月刊登通告「自爆」大股東與第三方洽商緊出售股權，3日之後停止洽商，股價3日間暴升暴跌。之後八月，前主席羅家聖就宣布因要退休而辭任，羅太錢曼娟就代夫出征，喺十一月出任非執行主席。
今次Kathy辭任，通告話佢想要完成個人目標，絲絲知道Kathy係「進修達人」，平時已經好鍾意進修唔同課程，由語言到運動都有，唔知今次係咪都想再進修呢？絲絲曾致電問Kathy嚟緊有乜大計，不過佢就話唔方便講住。
羅太錢曼娟做非執行主席時嘅袍金係32.5萬元，坐正執行主席之後，新嘅薪酬水平仲要等薪酬委員會及董事會決定。另外，現時嘅執董麥德昌會升任行政總裁，財務董事陳卓謙會升任執行董事。
余絲韻