《The World Is Flat》（世界係平嘅）係近年最暢銷書籍之一，可算是講及全球化嘅經典書籍，恒生銀行（00011）副董事長兼行政總裁梁高美懿（Margaret）日前返咗母校香港大學，與一眾師弟師妹分享點樣裝備自己，走向全球化，似乎同呢本書嘅作者Thomas Friedman理念一致。
Margaret勉勵師弟師妹，話依家係全球化嘅世代，多元化就係應對全球化最好嘅方法，無論面對社會、學習知識甚至管理時間，都要行多元化路線。佢曾出任滙豐集團總經理，有晒國際經驗，依家仲帶領一間由傳統錢莊轉型嘅國際銀行，教大家應對全球化特別有說服力。
勉勵之餘都唔少得告誡大家，Margaret話依家上網時，其實成個網絡世界嘅人一樣睇住你，引用外國科企高層話唔少年輕人有過尷尬嘅網上經歷，搞到出嚟搵工時要改名換姓，係「一失足成千古恨」。呢番語重心長嘅說話，與美國總統奧巴馬叫學生小心啲玩Facebook，真係有異曲同工之妙。
余絲韻