喺內地電訊業名氣響噹噹嘅「寬帶先生」田溯寧，原來唔只搞電訊業務有聲有色，財技亦好了得，佢依家打骰嘅華億傳媒（00419）尋日就公布，佢以每股13仙出售手上35億股華億畀Rich Public嘅袁海波，作價較華億停牌前股價有成1.6倍溢價，佢呢招「金蟬脫殼」，就輕易套現咗4.55億元，唔知佢會用呢筆錢嚟做乜呢？會唔會再投放喺其他電訊相關業務？
今次田溯寧出售部分華億股份後，佢嘅持股量會由20.67%降至8.51%，尋日華億喺晏晝復牌，股價一度被炒高56%，不過最終收市就回番好多，但都升咗成10%。另一方面，Rich Public亦向華億另一名股東收購合共7.31億股股份，佔已發行股本約2.54%，照咁計，佢將會係華億最大單一股東，唔知將來會有乜嘢大搞作呢？
田溯寧最廣為投資者認識嘅時候，係佢做電盈副主席嘅年代，而佢亦曾經係中國網通嘅始創人及總裁，約喺○七年底就入主華億。
余絲韻