做咗國資委主任7年嘅李榮融，終於要退下火線嘞，由於冇搞告別記者會，大家一時間唔知點好，就挖番佢主政時期嘅講話出嚟「贈興」。最有意思嘅，係佢喺月初曾經話，要將央企培育為好似米高佐敦及高比拜仁咁樣嘅「巨星」。
李榮融咁多年嚟為咗國企改革勞心勞力，佢以前都喺企業做過嘢，親身體會到要做一個項目，就要跑勻咁多個部門，跑唔爛三對鞋，項目都好難批落嚟；所以佢認為國企搞唔好，責任喺政府身上。
身為NBA忠實「粉絲」嘅李榮融寄語大家，喺球場上嘅球星一陣子投入兩分波，轉頭又投入三分波，睇落唔錯，但唔夠穩定，而球場「巨星」就一直閃爍。點解佐敦及高比係巨星？因為喺關鍵時候，佢哋可以承擔眾人嘅期望，一定唔會令人失望。
呢個就係佢對央企及大型國企發展嘅期盼，將央企培育為喺關鍵時刻唔會令人民失望嘅巨星。國資委嘅夢想係要30至50家國企躋身全球五百大企業，今年有24家央企上榜，仲未全部達標，佢都係時候將個波交畀新主任王勇喇。
余絲韻