又關風水事？美國紐約市地標之一嘅帝國大廈，最近傾緊一單出租寫字樓嘅大「刁」，可能會因為風水問題而擱置。根據美國報章嘅報道，呢單大「刁」嘅有意承租者正係香港人熟悉嘅利豐（00494）。
話說利豐搵外國嘅地產代理，喺紐約搵50萬方呎嘅地方做寫字樓，而呢幢有悠久歷史、見證美國經濟起落嘅帝國大廈，就成為利豐嘅其中一個目標。市傳租期15年，每方呎樓面租金要45美元（約348港元）。
不過《紐約郵報》就話，帝國大廈嘅西面會興建一幢67層高嘅大廈，預計喺二○一四年落成，屆時會好似一隻大手指咁，製造負面嘅能量，影響帝國大廈。報章仲搵埋鬼佬風水師做證，話帝國大廈嘅正能量會被新大廈慢慢吞噬，而篤信風水嘅利豐董事總經理馮國綸，好可能會因為咁而唔租帝國大廈喎，反正紐約仲有好多甲級商廈可以選擇。
依家單「刁」仲傾緊，但姑勿論風水師講嘅係咪真，如果爭取唔到利豐呢個咁有財力嘅大客，對帝國大廈嘅大業主嚟講，就真係一個負面嘅消息咯。
余絲韻