絲絲講場：宋林愛上份工至襟撈
絲絲一向都覺得華潤集團董事長宋林係一個好搏嘅人，佢點解咁搏就從來冇考究過，只知佢大學一畢業就喺華潤度做，一做就做咗25年，月薪由初入行時嘅1,785元，到○六年時已升到50萬元。
人工升得咁勁，究竟有乜秘訣？宋總話喺佢呢25年華潤生涯中，佢總結到一樣嘢，就係要投入感情「愛上你份工」，如果你只當份工係搵餐飯食嘅態度，肯定唔會做得好。原來宋總話佢一入行就喺華潤石油石化業務嗰邊做，當然係做卒仔啦，當時起薪點只有1,785元，佢已經做得好開心，仲要愈做愈鍾意份工，後來佢梗係調過好多個部門啦，乜都做過咁滯。
清狀況最遲收工
但佢最唔捨得離開嘅係華潤萬家，事關○二年時華潤萬家收購萬佳百貨失敗，佢當時兼任主席，遇到好多波折，係佢壓力最大嘅一年，依家事過境遷，佢仲做埋集團董事長，但早兩年佢去華潤萬家周年大會時，對住台下500名員工，講兩句就忍唔住喊咗出嚟，當年嘅辛酸實不足為外人道，所以佢以後都唔敢再去囉。到咗依家佢已經係全集團最大嗰位，但佢永遠係公司最遲走嘅人，因為佢永遠都想了解晒公司所有情況，先可以百戰百勝喎。
余絲韻