配合政府免當殃
有人喺20幾間地產公司嘅半年報搵啲有用資料，發現地產商嘅水源完全可以應付短期債務，甚至將銷售目標打個八折，仍然唔使擔心資金緊絀。既然係咁，仲使乜割價賣樓喎。
任志強就提醒大家，話政府有時希望做啲嘢，你就要配合。「我哋最擔心係政府繼續攞堆嘢出嚟，裏面仲有件準備用嘅『核武器』。做乜要逼政府搬件核武出嚟？我依家都服嘞，你哋都服喇，咁就唔使政府用到『核武』囉！」
連樓價大好友都話要配合政府，喺台下聽任志強演講嘅行家當然「識趣」。所以前嗰排大家都見到上海、杭州啲新盤減價促銷，銷情仲不知幾好添。大家肯賺少啲，都係唔想見到中央攞件「核武」出嚟啫。
余絲韻