絲絲都聽過唔少研究「股神」巴菲特嘅研討會，不過原來連「股神」嘅新抱都加入埋呢個「培訓股神」行列，佢本人係巴菲特研究專家，會喺今年十月於北京舉行嘅《複製巴菲特》研討會上講解巴菲特嘅投資理念。
女性想要好似女明星咁靚，就話可以攞住張相去搵整容醫生幫手啫，但投資者想複製「股神」就唔係咁易喇，所以坊間有大把書解構巴菲特，務求搵到「股神」複製模式。
巴菲特嘅新抱瑪麗喺八一年入門，咁多年來得以近距離觀察巴菲特，佢除咗正職係電影剪片公司CEO外，仲有份職業係巴菲特投資技巧分析書作家兼演講者，佢寫咗好多研究巴菲特嘅書，例如《巴菲特法則》、《巴菲特之道》、《新巴菲特法則》、《巴菲特法則實戰手冊》等，憑住巴菲特嘅名氣，呢啲書已經被翻譯成為18種語言，喺全球100個國家熱賣。
今年十月十一日，瑪麗就會去北京出席為期3日嘅演講活動，解析巴菲特嘅投資理念以及對中國投資市場嘅理解。
余絲韻