呢排國美電器（00493）大股東及管理層嘅輿論戰峰迴路轉，仲好睇過電視劇，絲絲時時刻刻都喺度追緊，這邊廂尚未刑滿嘅大股東黃光裕話要換咗啲管理層，皆因佢哋搞衰公司業績，那邊廂國美管理層又話要告黃光裕。點不知呢兩日仲半路殺出個程咬金，事關有傳與國美主席陳曉有「嫌隙」嘅前大中電器話事人張大中，會借幾億人仔畀大股東黃光裕與陳曉鬥過，而且係免息咁話，睇嚟國美事件都真係有排搞。
喺內地家電業係人都知，張總及陳總以前曾經有過「牙齒印」，事關喺○六年時，兩人分別係大中電器及永樂電器嘅掌舵人，喺陳曉嘅提議下，曾經與陳曉係競爭對手嘅張大中同意將兩家公司透過股權置換，實行合併結盟，由陳曉打骰；點不知唔夠3個月，陳曉去搵黃光裕密斟合作，張大中當然唔想，可惜已經太遲，張大中惟有將件事提交仲裁機構，但最終無礙大局，國美結果成功收購永樂大中。
所以呢排市傳話陳曉有計劃增發20%新股以攤薄黃光裕嘅持股比例，有人深信張大中會願助黃光裕一臂之力，傳出佢會借幾億人仔畀黃光裕。據內地傳媒報道，為咗呢件事，前兩日張大中已經由美國返咗北京坐鎮。
余絲韻