俗語有話「上有高堂、下有妻兒」，大家都知要擔起頭家真係唔易。最近富達做咗個有關「三文治時代」嘅調查，訪問咗中國大陸、日本、香港、新加坡、南韓、台灣及澳洲一共700人，了解佢哋點樣分配收入及投資儲蓄等。
所謂「三文治時代」係指需要同時供養父母及撫養子女嘅人，結果發現大陸嘅人數為亞洲之冠，喺介乎21至70歲嘅人當中，有37%都係夾心人，差唔多相等於亞洲整體水平嘅兩倍，而日本及澳洲嘅比率就最低，只有6%。
調查同時發現喺亞洲區內，中港兩地受訪者無論喺時間及金錢上都付出最多，成為最顧家嘅一群。有49%香港受訪者會用收入嘅11%至25%供養父母，大陸就有52%人，高於區內平均嘅39%水平；甚至有26%香港受訪者話會畀收入嘅三、四成做家用。其實咁樣都係歸咎於中港兩地一個家庭嘅孩子數目只會「一個起、兩個止」，人又長命咗，負擔自然重咗，唔怪得有53%香港受訪者話佢哋正面對龐大財政壓力喇。富達話愈早計劃退休愈着數，仲要識得適度投資，絲絲心諗各位打工仔由依家起要認真策劃吓喇！
余絲韻