絲絲講場:趙海珠留學暫別輪場

夏日炎炎,莘莘學子都享受緊暑假嘅時候,讀緊MBA(工商管理碩士)嘅法巴股票及衍生產品部聯席董事趙海珠(Alison)正為佢嘅碩士交流生生涯做準備,佢將會停薪留職,九月中起程赴日留學3個月,再喺明年一月回歸輪場。

赴日交流3個月

喺芸芸國家中,Alison最後揀咗去日本交流,佢話唔想去得太遠,佢喺大學一年級修讀日文後,就好鍾情當地文化,一直都想有留學嘅機會,可惜大學時代只係試過參加一個月嘅交流活動,今次可謂一圓心願!原來佢好鍾意去日本旅行,已經去過8次咁多,但次次都係睇風景,買嘢竟然唔係重點,偏好嘅地方亦唔係熱門大城市東京,而係郊外,所以今次揀嘅都係距離東京有個半鐘車程,喺新潟縣嘅日本國際大學。

絲絲問佢有乜嘢要準備,佢就話與當地人溝通好有信心,不過可以預計全職讀書嘅生活應該幾辛苦,要喺3個月讀6科,星期一至五都要上堂,分分鐘仲慘過返工!絲絲喺度祝佢學成歸來啦!

余絲韻