絲絲講場：陸東撐愛心陶藝
有「最準分析員」別號嘅陸東（Andrew），絲絲每次見到佢，都忍唔住問佢點睇股市樓市，所以覺得佢形象既嚴肅又專業。原來陸東有感性嘅一面，絲絲見佢嘅辦公室擺咗一啲好有趣嘅陶塑，細問之下，先知係佢所做嘅善事之一，呢啲作品由一班弱能人士所做，陸東會幫佢哋搞捐款活動，出錢又出力，睇得出佢真係由心出發。
依家喺瑞銀做外部顧問嘅陸東，一直都好支持聖雅各福群會活動，特別係推動弱能人士嘅陶藝發展，除咗捐款贊助，佢平時一得閒就會去灣仔石水渠街嘅「陶藝工作室」探吓班成員，以行動支持。
有能力應回饋社會
Andrew咁支持「陶藝工作室」，佢就娓娓道出因由：「香港係個富裕社會，有啲人嘅際遇比較幸運，自己就係例子，但有人未必咁好彩，所以有能力嘅時候就應該回饋社會。我透過呢班弱能人士所做嘅陶塑，就感受到作品之中存在天真嘅心靈，但又擁有大人嘅力氣，所以都買咗唔少當做擺設，有啲放公司，有啲放屋企。」
咁啱下周一下午兩點半喺尖沙咀海港城將舉辦「泥造人．樂造人」陶藝展覽，到時除咗展示超過20件嘅陶塑，Andrew亦會擔任主禮嘉賓，佢仲提醒大家要用包容及欣賞角度去睇呢啲作品添。
絲絲對呢啲作品都愛不釋手，到時一定去展覽會睇吓。
余絲韻