由中石油、中石化及中海油三大集團一齊出錢喺上海世博建立嘅石油館，運營咗3個月後，喺本周一要閉館一日，點解？咪就係要進行一次全面大檢修，為咗本月三十日（本周五）舉行嘅特別活動日而做好準備囉！
絲絲初時以為石油館會有新展品畀參觀者睇，但原來唔係，據絲絲老友講，嗰日會有50對從事石油行業嘅新人喺俗稱「油立方」嘅石油館，舉行名為「世博緣‧石油情」嘅大型集體婚禮。
呢50對新人唔單只可以喺世博園裏面影婚紗相，以及喺石油館舉行一場盛大婚禮，而且仲會乘坐花車巡遊成個世博園，絲絲覺得有個咁嘅婚禮應該都幾難忘。
另一方面，3家油公司喺特別活動日都會請一名工程院士擔任石油館嘅專家講解員，用深入淺出嘅方式，令參觀人士更加了解與生活息息相關嘅石油，同時仲會有好多紀念品送畀入場參觀人士添，當中被石油業人士視為吉祥物嘅「油寶寶」就梗唔少得啦。不過，如果今次去唔成世博石油館嘅人都唔使太閉翳，事關3家油公司家陣傾緊，會喺世博之後將呢個石油館搬去北京或大慶油田，等啲有興趣嘅人可以長期睇到佢哋製作嘅4D電影《石油夢想》以及了解石油歷史。
余絲韻