要管理一間銀行絕對唔係易事，身為全球市值最高銀行嘅董事長，姜建清更加要事事用心，例如工行（01398）喺全球二十幾個國家及地區都有分支機構，員工來自五湖四海，對於如何加強員工對公司嘅歸屬感，已經令姜總勞心勞力。
其中一樣好難搞嘅，就係要融合唔同文化嘅員工，原來工行喺呢方面亦花咗唔少心思。絲絲八到，早年工行收購咗印尼嘅Halim銀行，當地有唔少信奉伊斯蘭教嘅員工，為咗方便呢啲員工嘅宗教需要，工行印尼總部嘅每一層以及每一個分支機構均設立禱告室，方便佢哋每日按時禱告。
唔單只咁，絲絲記得伊斯蘭教一日有5次禱告時間，工行更會盡量避免喺禱告時間，為教徒員工安排工作或會議。咁體貼嘅安排，睇嚟姜總為咗提升外籍員工嘅凝聚力，真係下咗唔少工夫。
余絲韻