iPhone 4本周五正式開售，三大指定網絡商──和電香港（00215）旗下3香港、數碼通（00315）及CSL當然秣馬厲兵準備開戰，當中3香港及數碼通更喺開賣前夜鬥開Party。iPhone 4問世以來是非多多，但手機網絡商仍爭個你死我活，最開心嘅相信非蘋果公司嘅喬布斯莫屬！
按蘋果公司規定，本港三個指定網絡商均要到本月三十日（周五）先可正式開賣iPhone 4，而3香港及數碼通分別喺周四晚舉行開售派對，就係要搶於周五凌晨時分向客戶開售iPhone 4。其中3香港已邀請城中名人及特選客戶，出席將於港島海逸酒店頂樓舉行嘅開售Party，並於三十日凌晨向出席嘉賓售出首批iPhone 4，至於其他已登記嘅客戶亦會獲邀出席周五下午喺海港城舉行嘅活動，宣傳活動真係一個接一個。
數碼通亦唔示弱，尋日已向客戶發出電郵通知，話由於估計新貨將供不應求，所以用電腦抽出約2,000名已登記客戶，佢哋獲邀出席喺二十九日晚上至三十日清晨時分於IFC商場舉行嘅iPhone 4登場派對，等佢哋可搶先購買！
余絲韻