絲絲講場：股神拍賣巨型雪糕匙
「股神」巴菲特又諗到新橋做善事，就係拍賣一隻有佢簽名嘅5磅重雪糕匙簽名，為兒童醫院籌款。咁特別嘅籌款方式，籌到嘅錢會唔會多過早前以263萬美元售出同佢本人共進午餐機會嘅紀錄？
親筆簽名 網Bid捐慈善
巴菲特身為「股神」，一生不斷諗投資策略及揀選公司，但絲絲相信，佢花喺度橋籌款嘅心機與時間，絕對唔會少得過花喺投資上。講番今次呢隻巨型慈善雪糕匙，有成5磅重、33吋長，正常人唔會用佢嚟進食。隻雪糕匙係由佢有份投資嘅Dairy Queen贊助，有佢簽名，再擺喺eBay拍賣，底價只係99美仙。截至尋晚7時半，絲絲喺eBay見到已有47次叫價紀綠，Bid到2,850美元；呢項拍賣喺本月30日完結，相信個價仲會再上。
巴菲特與微軟創辦人蓋茨係好友，兩個人都樂善好施，巴菲特喺金融海嘯後就捐咗16億美元畀蓋茨嘅基金，佢仲喺自己個Blog度話，命運不可掌控，有錢嘅人有責任幫助有需要嘅人。
「股神」投資有道，依家佢副身家喺全球排第3位，佢亦一早承諾咗，會捐出99%身家畀慈善機構，資助消除饑荒、提升美國教育等項目。
巴菲特叱咤投資界咁多年，積聚咁多財富，佢最想嘅都係回饋社會。
余絲韻