絲絲廣場：耀才再開分行快達標
絲絲記得喺年初時，耀才證券話今年目標開設10間分行，未夠一年，轉眼已開到第8間，當中偏遠地區如元朗、上水、大埔及荃灣等都設有分行，方便住喺新界嘅散戶。尋日耀才中環分行就有舞獅剪綵儀式，宣布分行正式開張，主席葉茂林致詞時都好感觸，話「公司最初得5、6個人運作，輾轉做到依家嘅200多人，發展得好快。」
公司總經理陳啟峰話八月底10間分行會全部開齊，之後陸續會為各分行搞舞獅儀式，佢自己就要減定肥，因為到時食燒豬都有排食。
郭Sir巡迴落行講Talk
公司市務總監郭思治（郭Sir）嚟緊都有排忙，為咗與散戶嘅關係再緊密啲，每逢周三至周五收市後，佢都會巡迴式落分行搞投資講座，解答散戶嘅疑難。
余絲韻