絲絲講場：滙豐無險夏鈞年請辭
近期與保險圈老友傾開，知道滙豐保險有人事變動，上場只有5個月嘅滙豐保險總監及個人保險主管夏鈞年原來提早退休，而且仲已經搵人頂上，滙豐保險唔聲唔聲換人換得咁快，不期然令人懷疑係咪有啲乜嘢事情發生。
點解今次有呢個疑團？其中一個原因係夏鈞年負責滙豐個人保險，今年首季滙豐失落咗新做壽險嘅冠軍位置，由中銀人壽坐上一哥寶座，難免引起猜測。
不過聽滙豐保險啲老友話，夏鈞年係有啲私人事務所以請辭，更與太太一齊飛返老家加拿大，並唔係有啲乜嘢錯失。咁諗落又係嘅，如果因為單單一、兩季嘅業績就炒人就似乎太短視喇！
郜藝帆紮職頂上
至於剛啱紮上去嘅都係外國人，個名叫郜藝帆（Art Cozad），來自美國加州。原來佢喺滙豐做咗16年，呢兩年調到香港，而且係個好動嘅人，鍾意打壁球及歷奇旅遊，而且好享受喺香港可感受到唔同國家嘅菜式。咦？咁咪同佢鍾意下廚嘅老闆石湛森好夾囉！
余絲韻