絲絲講場:遠地股東會開足兩粒鐘

絲絲一年閒閒哋要去二、三十個上市公司嘅股東會,一般歷時都係15分鐘至1粒鐘不等,但尋日遠洋地產(03377)嘅股東會竟然開足兩粒鐘,由朝早9點半開到11點半,簡直好似睇咗場早場電影咁。

遠地嗰邊就話,公司係特登一早開會,預多啲時間畀小股東問夠為止。

畀小股東問到夠皮

咁小股東究竟最關心啲乜呢?原來佢哋最想知道,有啲內房股嘅大陸樓盤開始減價,遠地會唔會減埋一份?管理層好耐心咁逐一回答,小股東又非常踴躍發問,結果成個答問環節足足玩咗45分鐘。

遠地嘅IR(投資者關係部)靚女仲話,小股東問嘅問題,其實與機構投資者或分析員嘅提問大同小異,非常專業。

絲絲都覺得,依家啲小股東出席股東會,唔係淨係為咗喺酒店食點心,而係真心想與管理層溝通吓,了解多啲公司嘅運作,希望上市公司都效法遠地嘅做法,唔好淨係應酬基金股東,都畀多啲時間與小股東溝通啦。

余絲韻