股神巴菲特好鍾意扮鬼扮馬，早前扮過八十年代紅極一時嘅搖滾樂隊Gun N'Roses歌手Axl Rose，適逢一年一度嘅巴郡股東大會，佢又再次娛賓，不過唔知係咪上次親身上陣反應麻麻，所以今次佢就化身卡通人物，並繼續幫佢有份投資嘅公司大賣廣告！
今年嘅股東大會以一段搞笑卡通片掀開序幕，巴菲特喺片中扮演神秘百萬富翁俱樂部嘅創辦人，會員係小朋友，小朋友會向巴菲特及其他創辦人例如微軟嘅蓋茨提問，結果因為小朋友提問太刁鑽，令呢班大孖沙目瞪口呆，仲落荒而逃添！
播完卡通之後就播影片，播番佢啲生活照，有佢上次扮巨星、做棒球員嘅場面，仲有佢一邊飲可樂，一邊食See's Candies朱古力嘅片斷添！股神梗係唔會就咁幫人哋賣廣告喇，呢兩隻產品都係巴郡有份投資㗎！之後就開始問答環節，巴菲特話巴郡首季賺咗36億美元，扭轉去年虧蝕15億美元嘅困局。
話時話，巴菲特對上一次扮搖滾巨星，係為巴郡旗下汽車保險公司Geico拍年會短片，佢今次已經唔算「瞓身」，上次佢唔單止戴上長到落腰嘅假髮，仲帶埋紫色印花頭巾，身穿黑色皮Jacket及紅色蘇格蘭格仔裙深情獻唱，當佢高舉手臂時，仲露出密麻麻嘅紋身！
余絲韻