金融海嘯揭發唔少上市公司亂派花紅，搞到依家股東簡直聞「紅」色變。俄鋁（00486）尋日就公布派發上市花紅，當中老闆歐柏嘉（Oleg Deripaska）個人獨得超過五點四億元，不過俄鋁嘅股東唔使驚，皆因呢批花紅會用股份形式派發，影響唔到公司嘅。
俄鋁今次總共會向管理層派發約八千二百四十六萬美元（約六點五七億港元）花紅，當中歐柏嘉佔約七千零三十一萬美元（約五點四八億港元）會全部用股份派發，至於其他高級管理層嘅一千三百九十五萬美元（約一點○八億元）花紅，股份及現金分佔六成及四成，換句話說，其實只有五百五十八萬美元（約四千三百五十二萬港元）係現金花紅，批紅股仲有兩年禁售期添。
向管理層派紅股呢招其實喺外國好流行，皆因可以鼓勵佢哋畀心機做嘢，實行「股價好，銀包好」。查實俄鋁股價上市後一直「潛水」，尋日收市價九點五元距離招股價十點八元仲低一成二，加上呢次批紅股全部係用招股價計價，實可以刺激俄鋁高層努力工作，俄鋁股東們隨時「上水」有望！
余絲韻