絲絲講場：大新搵男模潮Sell新卡

做生意最緊要講噱頭玩包裝，好似大新銀行（02356）發布新信用卡「我至愛商戶」就講明參考IT潮物蘋果公司，要喺台上宣傳新產品，今次由執行董事兼零售銀行處主管藍章華（John）操刀主持儀式，佢仲話好好玩呢！

阿John解釋話，因為今次張信用卡與高清機頂盒公司合作，見係高科技嘢，所以發布會都想搞搞新意思。

絲絲見公司搵G模做宣傳就見得多，難得大新今次搵嚟兩位男模嚟幫手，至於男模有冇G模咁養眼，就見仁見智喇！阿John就親自向兩位男模授勳，之後男模就張開大新信用卡嘅旗幟，令人眼前一亮。

呢張新信用卡最大嘅賣點，就係用家可以每月自己揀5間心水商戶，喺呢5間商戶簽帳就享有10倍現金回贈，變相即係攞到九五折優惠。阿John知道今次新卡發布會有記者朋友嚟支持，派晒卡片嘅佢仲專登叫秘書影印咗佢嘅卡片，派畀到場嘅記者。

余絲韻