絲絲講場：港交所官網新Look更強
話港交所（00388）嘅官方網站（www.hkex.com.hk）係最多人瀏覽嘅網站之一，應該都冇乜人有異議，由於已沿用多年，港交所網站即將進行大變身，港交所會喺本周日（本月十四日）推出更新版官方網站，換言之喺下周一開市後，當大家Click入港交所網站睇港股資訊，就會見到全新面貌。
內容分類整合 強化搜尋
港交所網站變身後，與現時最大嘅分別係版面設計及找尋路徑，新網站並將不同嘅資料內容重新分類整合，仲加入一啲快速連結，好似分開投資者、上市公司、經紀、傳媒、資訊供應商及港交所股東，各取所需，並輔以強化嘅搜尋引擎等。不過，載有所有上市公司通告及權益披露等資料嘅「披露易」網站，暫時就唔會改變。網站變身前已畀業內人士試用，絲絲都登入過，覺得版面整齊咗好多，冇咁多不同項嘅資訊放晒喺主頁。
今次變身原來只係第一階段，仲有第二階段，屆時將加入一啲新功能，好似RSS，即係簡易資訊聚合，希望可以喺今年稍後時間進行。港交所去年曾委聘顧問就其網站進行改革，目的係希望其資訊架構能與本地及國際最佳常規一致。
余絲韻