港股近日愈來愈悶，尋日突然玩震倉，忽然高開後插水，近排大市悶到嘔，入市炒友都唔多，其實震倉都震唔出樣，結果上午打完冷震後，下午又當無事炒番上去。如果港股再係咁悶落去，只怕所有炒友會休戰離場，咁屆時場面就仲冷清。
尋日朝早震倉，古晨見到隻亞洲能源物流（00351）好有誠意，其實一開波，佢已經密密有盤掃上，早段期指跌得急嗰段，見佢都可守住0.162元個位唔失，走勢對晒辦。下午大市一回穩，就見佢積極咁掃上0.169元收市，見啲買盤係咁掃，翻查佢一月份曾以0.159元配股集資，經過兩個月消化，已經完成一個小圓底收集過程，睇怕街外都無咩沽壓。近期咁炒，分明係想炒番高個價，等接貨人坐得安心啲，反正價低，呢排炒股仔，一於追佢博上0.25元，止蝕位可定0.156元。
古晨