內地樓價高企，結果當然係令到經濟基礎薄弱嘅後生仔置業困難，仲有啲對社會不滿添，不過有唔少內地地產界人士就好唔認同，好似華遠地產董事長任志強就強調，房屋與鑽石一樣都係財富，買唔起就唔應該擁有，亦唔使指望樓價跌。
好多中港地產商人依家都聚集北京，近期好多言論引起唔少爭議，例如話冇能力就唔好埋怨政府、社會及開發商；普通老百姓應該有普通老百姓嘅生活方式等，任志強再加一個「鑽石論」，會唔會令事件火上加油呢？
一向言論出位嘅任志強接受內地傳媒訪問嗰陣，都話如果淨係為咗住，可以租屋，冇能力就唔應該買樓，呢個係一個觀念嘅問題，買樓唔係為咗住，而係一種財產，就好似鑽石咁。
佢又話從來冇聽說過有人因為買唔起鑽石而要求降價，將房屋降價只係將能夠負擔人士嘅買樓權利讓畀冇能力買嘅人。
余絲韻