大市昨日表現牛皮，但細價股就禾雀亂飛，之不過，細價股升得快時亦跌得快，選擇錯誤，隨時會接火棒損手離場，故較穩陣的選擇是半新股，當中可留意盈德氣體（02168）。
盈德氣體是內地最大獨立工業氣體供應商之一，而盈德客戶中，差不多全屬鋼鐵公司。隨着內地經濟復甦，鋼鐵需求逐漸回升，對集團業務有極大幫助。況且，集團自上市以來，一直穩守招股價樓上，經過五個多月收集期，相信基金收貨已收乾收淨，現時貨源頗為歸邊，一踢就上。
以過去五個交易日為例，積極買盤均以大行為主，好似摩根士丹利、花旗以及瑞銀等，其現身買盤次數分別由91至295次不等。當中，大摩昨日更發表報告，目標睇9.2元。集團昨日以一支大陽燭突破下降軌，成功轉勢，要重上高位9.5元應無難度。
（小尾）