市場熱線：航天萬源再展升浪

港匯有轉強迹象，反映資金重新流入香江，相信本地魚缸可以保持在高位先作整固。人仔升值預期升溫，紅色分子受捧，亦係另一個支持本地魚缸做好的元素，只要配合成交，古勝有信心本地魚缸可更上一層樓。

昨日恒指收報21,207點，微升10點，國企指數同樣僅升7點，收報12,210點。現貨場成交額縮水至584億元，明顯缸邊友要待多個大隻佬的業績公布後，再有信心入場。

憧憬祖移慷慨派息

期貨場轉炒高水，扣除大笨象（00005）以及將派成績表的幾個大隻佬派息除淨因素，期指實高水逾百點，呢一點或者有所啟示，好友似乎信心十足。大笨象昨日收報82.5元，跌0.6%，或者要待除淨前，才見「好息之徒」吸納，支持股價做好。

至於祖國移動（00941）連升三日，突破100日線74.5元水平，唔排除其成績表有番些少睇頭。上周被指不務正業入股浦發錢莊，令其出現超賣，加上缸邊友憧憬祖移慷慨派息，亦係支持股價上升原因。

古勝講過紅色地主已屆相當吸引水平，加上有言論指未來廿年，祖國屋仔市場仍處於升浪中，紅色地主在祖國魚缸勁升。本地兩大紅色地主中國海外（00688）及華潤置地（01109），股價分別升3.1%及4.3%，係昨日大隻佬升幅冠亞軍。祖國野獸（02628）跟平保（02318）升近3%，皆因祖國野獸發盈喜，調高其○九年盈利預測，帶挈平保股價同樣做好。

祖國兩會接近閉幕，暫未見有特別國策推出，不過會上極大篇幅討論新能源，相關股份理應再展開新一輪升浪。航天萬源（01185）早於○六年已轉型發展風電發電場，及製造風機業務，目前已有3個風電場投入營運，總裝機容量達425.75百萬瓦。

盈利步入高增長期

集團跟全球第二大風機製造商荷蘭EWT合作，於內蒙古設立風機零件製造廠，亦已完成首期設施，生產風機葉片同總機組裝，預期相關產品可於今年推出銷售。經幾年努力，航天萬源的新能源業務，開始步入收成期，○九年上半年業績已轉虧為盈，預期未來盈利可保持高速增長。去年底航天萬源為發展蒙古風電項目，曾以每股0.8元配股集資2.66億元，據聞當時接貨全部係芬佬。其股價一度炒高至1.46元，之後跟隨大市調整，打回原形，上月更一度跌穿配股價，沽貨主要係三兩個等錢使的鬼佬基金。

不過，當大市回穩後，其股價在0.8元有神秘買盤密密接貨，表叔線來料，全部係祖國投資者接貨，斷估表叔接貨後，至少要有五六成回報先滿意，即係話最少都上番1.2元。以航天萬源的業務發展趨勢，1.2元又豈能反映其增長潛力，在下則認為股價重上高位唔出奇，1.2元只係第一站。

古勝