絲絲講場:滙控撐音樂會吸拉美客

家陣生意難做,業務遍及全球嘅滙豐控股(00005)亦受歐洲及中東業務拖累,業績唔對辦,咁嘅環境下當然要出招吸客開源啦,所以佢哋就特別贊助喺英國倫敦南岸(Southbank)舉行嘅拉丁美洲音樂會及文藝節目,贊助期仲跨越今年整個夏天,顯見係金磚四國之一嘅巴西吸引力非凡。

贊助倫敦南岸「巴西節」

南岸貴為倫敦新興文化藝術中心,吸引各地遊客及藝術愛好者,獅子銀行今次贊助六月至九月舉行嘅「巴西節」,目標當然係吸納拉美市場客戶,聽講節目內容誇啦啦,重點活動有Gilberto Gil及Maria Bethania嘅音樂會,又有由足球員變身評論活動家嘅Socrates之講座,南岸鄰近畫廊及博物館更展出南美洲藝術家作品。

獅子銀行冇透露活動贊助金額,但主席葛霖上月公布今次贊助時話,喺現今經濟環境,外界絕對會認為呢類贊助係昂貴嘅,然而世界經濟重心已移向新興市場,文化重心自然亦會作出遷移,仲話15年內巴西會成全球第五大經濟體系,銀行自然不可輕視。

當然獅子銀行亦非只講付出不求回報,銀行文化贊助阿頭Maria Winn-Moon話,每次贊助後都會作出評估,了解「投資」回報。南岸活動預期吸引700萬至1,000萬人參觀,當中銀行品牌亦會伴隨活動向人流滲透。

余絲韻