雖然早段在大笨象（00005）支撐下，本地魚缸曾上升，可惜在其派成績表前夕，加上紅色錢莊仍存在集資陰影，缸邊友抱觀望態度，本地魚缸迅速掉頭向下。

另一邊廂，希臘未能交出令歐盟滿意的還債方案，盤數仲係唔清唔楚，評級機構有意再調低其信貸評級，幾乎去到「極之垃圾」的級別。最終恒指收報20,399點，下跌68點；國企指數收報11,388點，跌104點，成交額得614億元，古勝望住個市都「放晒蚊」。

內銀股長線睇好

藍色大隻佬普遍下跌，唔少大行在大笨象派成績表前唱好，更調高其目標價，對其股價帶來支持。祖國移動（00941）變動不大，下周派成績表的港交所（00388）則下跌，雖然有大行調低其盈利預測，但維持其「買入」評級。「伯哥」拍晒心口話「息魔」未有耐現身，本地地主又跑贏大市。信置（00083）散場後派成績表，但早已偷步炒業績，股價逆市勁升4.4%。結果係集團盈利增長64%至33億元，略勝預期，今日後勁不繼抑或延續升勢，古勝烏卜卜，要睇埋魚缸整體行乜方向。

紅色錢莊繼續受集資陰霾所影響，已公布供股方案的招行（03968）及交行（03328）溫和下跌，其餘紅色錢莊跌幅超過1%。在下相信短期紅色錢莊未有運行，不過長線仍睇好，加上現價估值便宜，可吸納作中線投資。

全球經濟復甦，航運股有機會翻身，最近見芬佬密密收集，唔少航運股已跑贏波羅的海指數，太平洋航運（02343）股價仍相對落後，有較可觀上升空間。睇番基本因素，太航其實唔輸蝕，在業內擁有領導地位，去年六月底止中期業績更打破了同業「見紅」的宿命，錄得7,482.9萬美元純利，更維持將五成以上純利派息益股東。

管理層理財有道

太航因成本控制得宜，其運送的貨種亦較多元化，有助分散風險，故能在行業逆市中保持盈利。至於財力方面，太航亦勝其他同業一籌，管理層一直審慎並靈活理財，在○八年下半年，金融市場低潮時，贖回部分可換股債券，又於去年五月魚缸回復暢旺時，批盪1.75億股，成功集資9,700萬美元。

目前手頭現金達11億美元，淨現金3.23億美元，折合25億港元；淨現金幾乎佔去市值20%，料可應付未來3年4億美元的資本開支，短期並無集資壓力。

唔少芬佬積極儲貨，當中以「瑞士佬」最積極，由上月初開始多次增持，至今持股量達13.23%，而且增持均價由6.547元至6.821元不等，較現價高出一成。

古勝