本文重點
所謂入鄉隨俗，好多外國人嚟到唐人社會，都興打扮成傳統中國人。好似星展集團執行總裁古普塔（Piyush Gupat），第一次飛嚟與星展香港班員工會面都着番件唐裝衫應景，順便向大家拜個早年，咁識做嘅老闆，員工自然歡喜啦！
其實Piyush對香港都唔陌生，因為佢嘅舊東家花旗之前都派佢嚟香港負責策略性工作，仲住喺香港足足兩年！佢話以前冇乜機會見傳媒，依家新工作之一係要周圍識多啲記者朋友！
香港印象「好荒蕪」？
問佢對香港最深印象係乜，佢話覺得香港好荒蕪。絲絲有冇聽錯？香港係石屎森林，邊度荒蕪呢？原來佢同太太一齊住喺香港時，曾經去咗個瑜伽宿營，宿營地點喺新界，Piyush話嗰度四野無人，周圍都係農地。哈！呢個香港印象都幾特別！
Piyush今次嚟香港仲有個特別任務，就係與星展香港行政總裁葉約德（Amy）一齊去星展社企嘅年宵攤位剪綵，兩大老闆親自到場，呢幾個攤位一定好旺啦！
余絲韻