本文重點
喺內地做生意，最緊要係把握好政策嘅風向。好似早排東方海外（00316）出乎意料地以低於市場價格，沽清七個內地地產項目，有口痕友就猜測，唔知會唔會係公司「感覺到」風向將會轉變，先行做出「趨吉避凶」嘅安排。
董建華家族做大股東嘅東方海外，喺內地房地產市場經營十多年，今次用二十二億美元賣走嘅七個內地地產項目，部分已接近收成期，地點都唔錯，揀呢個時間一口氣賣晒內地位置甚佳嘅地產項目，好似當啲地產係有病咁，要同佢哋劃清界線。
低於估值售七項目
佢哋搵咗戴德梁行做獨立估值師，個成交價比估值師嘅估值低出幾個百分點，完全反映到公司急於求售嘅心態。
東方海外唔等埋收成就沽貨，絲絲都認為係一個「趨吉避凶」的決定。事實上，內地近排又真係有好多限貸嘅消息，又有好多針對囤地嘅措施都衝着房地產而來，正所謂走得快好世界。
余絲韻