本文重點
嚟緊周日就係大年初一，相信家家戶戶已開始四出搜羅或自製賀年糕點食品。絲絲收到風，恒生銀行（00011）今年會繼續傳統為員工特別炮製蘿蔔糕，據聞呢款獨門糕點深受員工歡迎，今年內部訂購創新高，接獲1,800份定單。
自家製接1800定單
原來恒生自家製蘿蔔糕呢個傳統始於○一年，每年由該行嘅職員餐廳廚師親自主理。為咗迎合員工口味以及確保食物新鮮健康，餐廳每年都會收集員工意見，喺烹調及材料配搭方面作出改良，務求精益求精！
恒生助理總經理兼人力資源主管林周露兒話，啲蘿蔔糕咁受員工歡迎，主要因為材料十足喎。咁唔食得葷嘅員工又點算呢？唔怕，因為恒生備有素食蘿蔔糕可供選擇，認真細心！
售價方面，每份蘿蔔糕只係賣20蚊，又確實比出面商戶售賣嘅超值！絲絲粗略估算，恒生喺香港約有8,000名員工，佢哋今年收到1,800份定單，咁即係約每4個員工就有1個人幫襯，生意真係拍得住坊間啲餅家！
余絲韻