農曆新年長假當前，市場氣氛好靜局，大市連跌咁多日，鮮有反彈之勢，炒友都疊埋心水過年，真係炒年糕好過炒股票，否則無喇喇屋企多幾隻蟹過年就唔多好啦。
市靜靜，啲股仔開始乾跌，鬼咩，無人做嘢，又遇上啲心急人沽貨套現，咪見牌就隊，小心過年前會有大震倉出現。
無錢無勢，神仙難變，大戶有心向下炒，過年前港股都係無咩運行，現時最好係靠邊站，一於等過完年先算，如果真係想買少少炒吓炒吓，古晨就建議可以留意隻深圳國際（00152）。深國本身實而不華，今次跌市，股價雖回落，但跌幅唔多，算係好硬淨。去年上半年盈利多賺25%，相信全年業績應有驚喜，一於吼實佢嘅低位，把握入市機會，今年高位有條件睇0.75元，止蝕不妨定0.52元約50日線水平。
古晨