本文重點
仲有唔夠兩個禮拜就到虎年，除咗身體要「虎虎生威」外，股票生生性性、發光發亮都應該係股民嘅心願。信誠證券喺上周五搞咗個周年聯歡晚宴，正正就以「迎春接福，股股生輝」做主題，今年佢哋仲搞搞新意思，首次請嚟舞獅助興，又畀賓客與舞獅合照即影即有相，就連抽獎禮物都有舞獅公仔，一連串活動令當晚喜氣洋洋。
派花紅個個笑逐顏開
當日難得見到該行董事總經理劉升昂，絲絲當然捉住佢問吓點睇個市啦，平時絕少評論大市嘅劉生就話，今年港股係唔穩定嘅一年，但整體仍樂觀，投資者要識得穩中求勝，入市要三思，唔好太心急。去年股市成交大增，該行員工所分花紅一定唔少？佢笑言派花紅後個個都笑逐顏開，實數幾多就唔多講喇，免得其他行家羨慕，總之今年人人賺大錢，個個身體健康就可以啦。
余絲韻