本文重點
全國政協委員黃英豪近年由政壇轉向財金界發展，憑着專業知識，佢專門做「白武士」收購一啲被清盤嘅公司，去年嘅代表作係香港資源（02882）（前稱海域）以及仲停緊牌嘅金至尊（00870）。堅尼地（黃之洋名）近日又有動作，而今次目標係去年七月突然停牌嘅福記食品（01175）。
夥拍譚魚頭創辦人
絲絲記得堅尼地每次收購都會搵個Partner，而今次佢嘅Partner係內地火鍋連鎖店譚魚頭創辦人譚長安，佢話與譚長安已相識一段日子，遇到有好機會就一齊合作，佢又話福記嘅Case唔係咁簡單，佢同譚長安之前已開過好多次會同做研究，唔係話去就去。
講到譚魚頭，絲絲記得佢哋喺○一年進軍香港時，已講明有意喺香港上市，但一直只聞樓梯響，未有成事。絲絲老友話譚魚頭想以紅籌身份上市，但近年內地嘅方向係想好嘢留喺內地上市，因此已好少再批紅籌來港上市，咁就解釋到譚魚頭點解到依家仲係原地踏步。如果今次佢哋與堅尼地成功投得福記，下一步係點應該唔難估。
余絲韻