俄官「晒冷」來港祝賀

聽聞今日出席者除咗俄鋁公司嘅人，包括大股東兼有「俄羅斯首富」之稱嘅歐柏嘉（Oleg Deripaska）同佢位太座Polina、管理層及董事局成員好似張震遠、梁愛詩等之外，其他捧場者嘅陣容亦超強勁，包括俄羅斯政府駐中國大使、俄羅斯金融服務監管機構巨頭，甚至俄羅斯總統梅德韋傑夫嘅兩位顧問等都會千里迢迢來港祝賀，當然仲可能包括對俄鋁喺香港上市一直非常關注嘅大批俄羅斯傳媒添！

晚上揀中環Sevva開P

新上市公司嘅上市儀式完咗後，晚上例牌有慶祝活動，一般上市公司都會揀喺中環或金鐘嘅酒店Ballroom舉行，多數係食晚飯，如果係內地企業就肯定食中菜，但俄鋁就非常特別，特登揀咗去中環太子大廈頂樓間型格餐廳Sevva舉行私人派對，形式唔係太正規傳統，係輕鬆嘅雞尾酒會。

話說呢間Sevva餐廳大有來頭，係明星李嘉欣慶祝結婚嘅地點之一，特色係有大露台，喺香港嘅夜色襯托下，摸住酒杯底傾偈，俄羅斯人都算識享受，唔知有冇好貴嘅魚子醬食呢？

余絲韻