恒指在失守21,000點頸線後，無幾日又即時再試20,000點，連跌五日後，尋日跌勢相當全面，上至大藍籌，下至二、三、四線股都殺無赦，金魚缸邊屍橫遍野，睇嚟班大戶仲未收手，短期都係有反彈無大升，加上農曆新年在即，都係留番個錢傍身穩陣啲，暫時入市千萬唔好過勇。
大市氣氛咁差，要炒股都幾難，早前紅籌炒重組，其中北控（00392）喺去年十一月傳出重組消息，成系逐隻炒上，隻隻都炒過晒，但一直只聞樓梯響。隻北京建設（00925）早前改埋名，看來都係準備做嘢，加上北京市已落實1,400億元嘅發展大計，未來應該大把注資機會，尋日突然逆市炒上，最多升過一成，認真巴閉，睇番佢於0.8元橫行多時，向下空間好有限，如果一旦落實注資，成個勢又會唔同晒，尋日咁升法應該信得過，博向上睇1.25元，止蝕就定0.85元。
古晨