恒指恐下探19500

下半場祖國魚缸跌勢加劇，深滬兩地魚缸跌逾2%，本地魚缸「蛇滑梯」，恒指失守上周五低位20,250點後，直插落二萬關附近。恒指散場收報20,109點，再插水2.3%，國企指數更插水3.7%或448點，收報11,410點。由於恒指已跌穿去年十月低位20,200點，若短期未能重返20,600點之上，二萬點關必破無疑，或要進一步下試19,500點找支持。

藍色大隻佬只有利豐（00494）、港燈（00006）跟和黃（00013）避過一跌，後者再獲超人增持至51.85%，對股價有一定支持。大笨象（00005）早段反彈，下半場則「嘔凸」跌0.2%，淡友殺倉終於要搵重磅大笨象跟祖國移動（00941）祭旗，估計呢兩日兩巨無霸跌勢將加劇。富士康（02038）發盈警，昨日急挫8.7%，在眾大隻佬中跑第尾。不過「大魔頭」認為富士康發盈警插水，提供上車機會，重申其「增持」評級，目標價11元，信不信由你。紅色錢莊跟紅色地主仍然疲弱，錢莊被限制放水，紅色地主銷售亮起警號，兩者唇亡齒寒，雙雙被開刀狂質。

大部分斷估專家都預期今年煤價上升，但「最信」早前卻大唱反調，發吹水報告指煤價今年漲勢將告一段落。電力股一直落後大市，待電價調整及進一步改革將引發潛在重估，維持行業「增持」評級。眾多電力股中，古勝較睇好華潤電力（00836），其股價昨日早段逆市上升，午後雖不敵大市跌勢，最終跌2仙收市，但相對其他大隻佬閒閒哋跌超過1%，表現算唔錯。

購煤礦以穩定供應

電力股表現疲弱，講到尾都係煤價高企，不過華潤電力早於去年斥70億元向山西煤礦大亨邢利斌旗下聯盛的合營公司收購39座小煤礦，該批山西煤礦擁有資源儲量總計高達6.748億噸，預計今年的總產量將達887萬噸。此外，集團亦跟祖國煤礦企業簽訂了一○年合同，價格較○九年同期上漲10%，已準備了近五成電煤的需求。潤電亦計劃在未來一兩年內，整合為13個較大煤礦，並把年產量提升至2,000萬噸左右，潤電更有效地對沖煤價上升的風險，較其他電力股有更大優勢。

古勝