創立於一九一○年嘅金銀業貿易場，今年剛好成立100周年，係全球唯一擁有百年歷史嘅黃金交易所，實在非常難得，佢哋將會大搞百年慶祝活動。
標誌設計比賽反應佳
金銀業貿易場理事長李德麟話，由於今年係貿易場100周年大日子，佢哋依家已着手籌備百周年嘅紀念活動。好似早前就搞咗個百周年標誌設計比賽，反應唔錯，收到唔少設計頗具心思嘅作品。
香港嘅百年老店已經買少見少，尤其係金融服務行業，就更加係少之又少，絲絲都覺得，貿易場好應該把握呢個機會大力推廣，一洗舊式兼老化嘅形象，進行「大翻新」。
貿易場近年做嘢速度其實已經快咗，好似旗下電子交易平台引入莊家制，由去年中着手研究到進行系統編寫及提升工作，已於去年十二月十一日投入服務，首階段先由一家行員提供雙邊報價，另有兩家行員正積極進行測試，稍後將參與報價。產品方面，下一個目標係籌備九九金（港金）電子化交易。
研設化驗所開放驗金
由於驗金服務需求增加，佢哋亦着手研究自行設置貴金屬化驗所的可行性，並擬委託香港生產力促進局為顧問，除可幫助貿易場開拓具本地特色嘅黃金交易品種外，亦可開放驗金服務畀公眾人士。換言之，絲絲都可以將屋企啲金攞嚟驗吓，對提高貿易場知名度應該好有幫助。
余絲韻