全球關注內地資金供應問題，美股連插三日水，港股跌至20,000點邊緣，似彈非彈，唔知開邊瓣，雖然大市止咗瀉，但鑊鏟友入市意欲認真低迷，尋日市場又悶又靜，無晒鑊氣，再咁搞個市遲早陰乾，屆時個個無運行。
傳內地會進一步收緊銀根，但實際情況如何，仍有待觀察，尤其是傳首個禮拜內地新增貸款突破6,000億元人民幣，看來市場資金流動性仲係好充裕，國策扶持嘅行業，所受影響應該甚細。
拓展太陽能係國策所在，去年「金太陽計劃」令相關股份大炒過一轉，受惠股卡姆丹克（00712）近日更擴展江蘇附屬，以應付需求。睇番佢從高位回落咗三成，以幅度計都夠晒數，尋日出現破腳穿頭，似有反彈之勢，可把握低位買番些少傍吓身，向上反彈睇3元，跌穿1.97元止蝕。
古晨