本文重點
任志剛向來好鍾意行山，退咗休三個幾月，終於有時間再遊龍脊，自然有另一番滋味。上周日天朗氣清，無官一身輕嘅佢，當天中午懷着輕鬆自在嘅心情沿大潭出發，經引水道和土地灣，行到脊上已經下晝三點幾，但現場仍非常熱鬧，任總見到好多滑翔傘，與龍共舞令佢心郁郁，好想放膽試一試。
想玩滑翔傘唔敢冒險
不過佢做咗監管機構咁多年，乜都講求將風險管理好，就算依家退休，都係改唔到呢個習慣，所以衡量吓自己年紀、體能之後，正所謂呢個時候係避險而唔係冒險，體能亦唔足以審慎將風險管理好，結果只好企喺龍脊上向空中嘅滑翔傘玩家熱烈咁招手，以示鼓勵。
不過絲絲估呢班滑翔傘玩家喺空中都睇唔清楚係邊個招手，最多只會見到一頭白髮。任總人氣指數仍然好高，沿途有好多行山人士認得佢，佢哋仲要求同任總拍照留念，可惜任總嗰日冇自備相機，所以冇辦法同大家分享此情此景。
呼籲行山友Send相留念
任總都好醒，識得喺自己個Blog呼籲當日偶遇嘅行山友，將當日嘅相傳畀佢留為紀念。由於冇龍脊之行嘅相，任總喺個人Blog上只好同大家分享佢最近一次日本九州之旅嘅照片，見到相中嘅佢精神抖擻，仲有一啲同老婆一齊影嘅溫馨照片，有興趣嘅就上網睇啦！
余絲韻