喺按揭證券公司度過咗十二個寒暑嘅高級副總裁霍子俊（Kenny）最近請辭，雖然話留任至三月底，但佢喺上周已開始休假。工作多年難得暫時退下來，應該好好享受一下，不過絲絲聽聞Kenny仍然好忙，到底忙啲乜？相信大家可能估唔到，呢個係好多在職媽咪都好嚮往嘅生活，就係返屋企湊仔女。
依家Kenny日日要湊佢個小公主返ＢＢ班，接上接落其實真係好忙，得閒仲要帶小公主去公園玩吓，少啲精力都唔掂。即使有悠長假期，佢暫時亦冇打算外遊，只會留喺香港休息吓就算，因為小公主未有假放。湊女嘅工作梗唔係想像中咁簡單，不過Kenny湊得不亦樂乎，絲絲估佢都唔會喺屋企做「湊女公」太耐，相信好快就會重投金融界大展拳腳。講真句，轉個新環境工作都係好事，話晒有啲新刺激，可刷新吓思維，仲有係唔趁住依家轉工，唔通老咗先學人轉工咩！
余絲韻