本文重點
就快上市嘅南戈壁能源（01878）尋日舉行投資者推介會，佢哋嘅主要礦場喺蒙古，所以公司特登邀請咗一班蒙古模特兒及樂隊喺現場表演助興，仲送咗一大袋有關蒙古嘅書籍畀投資者，務求大家對蒙古多啲了解！
邀蒙古樂隊助興
南戈壁次次送禮都好有心思，話說上月初就曾經邀請一班傳媒去蒙古實地睇礦場，當時就送咗一人一塊由公司出產嘅煤！
當時當地氣溫零下30度，令人有「雪中送炭」嘅感覺喎。
尋日公司冇送煤畀投資者，不過就送咗一啲有關蒙古嘅書，絲絲八到，入面有介紹蒙古經濟、地理、政治各方面資料嘅「蒙古指南」、一本圖文並茂介紹蒙古游牧民族嘅書、一張蒙古地圖，仲有一隊蒙古民歌樂隊Altan Urag嘅ＣＤ添。
呢隊樂隊主要演奏蒙古傳統樂器，南戈壁今次仲特登邀請佢哋嚟助興，嘉賓入場及離場時都可以聽到佢哋嘅精彩表演㗎。
余絲韻