獨立股評人 黃偉康（Andrew）
推上3萬一廂情願
高妹：7家大行齊齊唱好港股，背後真係冇隱憂？
黃偉康：○七年恒指上到32,000點，已經存在好大泡沫，唔通大家都相信今年嘅實體經濟會好過○七年嗎？老實講，回顧○九年各大企業嘅盈利都追唔上○七年，咁試問今年恒指憑乜嘢能夠上試3萬點高位呢？而且今年流入港股嘅資金一定會比去年為少。
莉莉：市場憧憬股市向好，或者真係推到恒指上3萬點呢？
黃偉康：連中央都話「經濟仲未度過危險期」啦，○九年過分反映經濟復甦，股市大升，但實體經濟又未回復，令到今年推動恒指上升嘅空間縮減。另一方面，預料中央將收緊銀行貸款資金，又極力打擊違規活動，現時好難估計各國資金政策，所以第一季嘅各項業績、數據會好重要。
高妹：咁今年買乜嘢類型板塊最好？好多散戶都想知內房股走勢㗎！
黃偉康：上半年內房股仍然會受壓，部分差啲嘅公司或會再有10%下跌空間，建議散戶唔好玩住。我自己都睇好資源及能源類股份，當中特別喜歡卡姆丹克太陽能（00712）。總之一句，當金融市場開始過於穩定時，我哋反而憂慮會否出現「泡沫爆破」。
心理學家 顧修全博士
剖析買股ABC理論
莉莉︰點解恒指升咗咁多，買股票都賺唔到乜嘢錢？
顧修全︰股票投資有一個「A、B、C」理論，「A」和「C」就係「Antecedent（前因）」和「Consequence（後果）」，大家明白升跌市背後嘅原委，但就忽略中間嘅「Belief（信心）」，市場時刻出現消息動搖投資者信心，見到恒指目標價被拉高，投資者自信心就再高啲，所以遲遲唔止賺，最終變成蟹貨，講到尾就係唔清楚自己嘅Ceiling，一見到投資氣氛暢旺就不斷提升Ceiling高度。
莉莉︰散戶齊心合力推高Ceiling水平，創造恒指新高，股災就唔會發生啦？
顧修全︰你咁樣諗係有問題，因為每人都有一個「自我破壞」（Self-sabotage）嘅心理機制，舉個簡單例子，當你遇到鍾意嘅男仔，你唔敢行埋去認識佢，若呢個男仔走上前，主動同你傾偈，你亦都唔敢開口喎。其實投資就等如同股市拍拖，就算大市不斷攀升，升到你心目中嘅目標價，嗰時你就會驚，一驚就出現恐慌性拋售，大冧市就係咁樣出現。
高妹︰點樣先可以忠於自己嘅Ceiling，升市時唔會腳仔軟，狠心離場？
顧修全︰細過成日聽阿媽講「第時搵到『十萬九千七』就話你叻」，但你認為「十萬九千七」真係極大嘅金額嗎？我會探究個體戶本身與錢嘅關係，分析投資者嘅財富心理背景，由個人「Money history」出發，例如父母有冇為錢銀嗌過交、過往贏錢和輸錢紀錄等，從而推敲投資者對金錢嘅敏感度。
法巴股票零售衍生產品部執行董事翁世權（Simon）
輪證過熱預示危機
莉莉：玩窩輪、牛熊證有乜嘢風險？
翁世權：如果恒指由現時水平升到29,000點，其實都係升三成左右，升幅唔算多。當然，若今年恒指採取「慢慢升」嘅勢頭，咁窩輪就最好玩；最驚反而係牛皮市，投資者可能要等好耐先等到一日突破市，令時間值受損。
高妹：點樣透過觀察窩輪、牛熊證嘅成交量，預測恒指會出現大調整嘅訊號？
翁世權：假設港股成交額過千億，當中窩輪和牛熊證佔大市成交額接近三成，呢個係一個警號，代表市場短炒資金太多，股市和投資者均到達亢奮程度，此時大家都應該小心。
莉莉：散戶操縱市況能力有限，學識控制風險先最重要，你有乜嘢投資心得可以分享呢？
翁世權：牛熊證有收回價，因此散戶投資時要貼市之餘，斬倉和止蝕都一定要夠快；至於窩輪，如果你太驚，唔敢「坐盤」就一定賺唔到大錢。講到底，投資要掌握風險，亦都需要勇氣。
撲克占卜測炒股野心
「撲克占卜」可以反映股友潛在嘅性格，首先諗一個3年內想喺股場上實現嘅目標，諗好之後，就揀一隻牌。
葵扇A（顧修全之選）投資野心大
揀咗「葵扇A」嘅股友，代表投資態度進取，想不斷挑戰跑贏恒指，證明自己能力高人一等。你最終所得回報會距離目標不遠，但由於投資野心極重，有時會因一時衝動而做錯決定。
紅心A（黃偉康之選）採中庸之道
「紅心」圖案表示喜歡採取中庸嘅投資之道，覺得技術和運氣同樣重要，會盡力兼顧大市變化及個人睇法，投資工作愈忙愈精神。你會有其他目標，增加生活情趣。
梅花A（翁世權之選）博冷有諗頭
鍾意「梅花A」嘅你唔會隨波逐流，投資有個人風格，你會有好多千奇百怪嘅諗頭去完成所定嘅目標。勤力嘅你努力發掘冷門嘅爆升股，希望憑此增加自己嘅投資回報。
階磚A靠運易滿足
揀咗「階磚A」，就知道你不太相信基本分析，認為投資多靠運氣，相信只要隨遇而安，最終都會達到目的，所以你定下嘅目標亦唔會遙不可及，凡事做到剛好合格就已滿足。
另外，近期銀行按揭戰重燃，紛紛降低按揭息率，實施按息低於2厘。咁多好處之下，唔知投資者又會唔會考慮轉按呢？據今期《東方產經》網上民意調查，截至上周末晚上6時，70.7%人話會考慮轉按，29.3%人就話唔會考慮。
莉莉、高妹
若有料報畀高妹同莉莉或有嘢問，可電郵money.biz@opg.com.hk