本文重點
蔡漢平剛啱喺本月二日出任利基（00240）旗下基利承建嘅董事一職，唔講唔知，原來佢去咗中東兩年，但係屋企人就唔係幾習慣嗰邊嘅生活及文化，所以佢諗住返香港，咁啱利基主席單偉彪想做多啲建築生意，所以就叫咗佢加盟幫手。
加盟利基建築部
蔡漢平做咗呢行三十幾年，當初係學師出身，早兩年與老婆同個仔過咗去中東。佢曾先後喺俊和（00711）及新地（00016）工作，好熟悉建築行業，咁啱利基原本個起樓部門就好細，依家想擴大個部門，即刻就請咗蔡漢平。
佢同絲絲講，話香港政府明年基建預算有成500億元，加上又有好多學校拓建，又要起新醫院，個餅愈嚟愈大，所以建築業有好多商機。
啱啱喺中東杜拜返嚟嘅蔡漢平又覺得，杜拜嘅基建已經做好晒喺度，只要環境轉好，未來都會有一番作為，佢又話其實杜拜好多工程未喺債務危機浮面前已經停咗，而阿聯酋嘅老大哥阿布扎比就無乜受影響。
余絲韻