雖然港股昨日整體下跌，但二三線股仔氣勢不俗，而且成交亦能配合，股友都話有個新開始。詩詩大除夕買定中國森林（00930）過年，果然攞到個頭彩，既然有勢，一於揸多一日。
過去幾個月煤價穩步上揚，可憐水泥股的成本直接受煤價影響，過去幾個月表現一直落後。不過市場一直憧憬水泥業重組，加上中央控制產能，始終會利好水泥價格，尤其山水水泥（00691）上月見機構投資者頻頻增持，相信股價完成整固後，短期走勢可見突破。
中央嚴打產能過剩行業，水泥業亦在需要整合之列。不過以山東為基地的山水水泥，全國排行第四大，屬於龍頭級數的水泥企業，料可受惠於行業整合，為其提供購併機會。加上山水水泥正由核心市場，轉戰其他周邊地區，位於東北地區新型乾法水泥生產線已投產，而該區的水泥平均價格明顯高過山東地區，估計東北地區可成未來集團盈利的增長亮點。
詩詩